Der Berner Mattegucker

Wo isch d'Prinzässin (berndeutsch)

Em Benni isch es a däm Sunntigmorge so öppis vo längwylig gsy, är het gmeint, är verfuli jitz de grad, we nid gly öppis passieri.Lyslig, für niemer ufzwecke isch dr Benni ufgstande u dür z Huus tüsselet. Ir Chuchi het är zum Zmorge e grosse Schluck Coci gno, diräkt us dr Fläsche. Vo geschter het’s no es chalts Wienerli vorig gha, är het dry bisse u nächhär no chly Mayonnaise druuf. Dr Benni isch lyslig dür z Huus gschliche, vilecht git’s öppis Nöijs z entdecke? Irgendwie het’s ne aber geng wider i ds Büro vom Vatter zoge. Dört isch dr Computer gstande.

Dr Benni het strängschtes Computerverbot gha. Einisch het är eleini umepröblet u prompt isch alles abverheit. Dr Vatter het es Riesecabaret gmacht, sithär het dr Benni nümme a Compi dörfe. Aber gluschtet het’s ne immer no!  «Das wär doch e super Glägeheit», chüschelet e Stimm i sym Chopf. «La’s la sy, längs nid a, das git wider nume es Theater!» chüschelet e anderi Stimm.

Zum Überlege hocket dr Benni afangs emal uf e Bürostuehl.  Er spielt chly mit dr Computermuus u mit dr Taschtatur, drückt hie u dört. Mit spitzige Finger het dr Benni am Ein/Aus-Schalter vom PC umegfingerlet.  Sys Gsicht im Bildschirm het ihm zueblinzlet. Hoppla, jitz bin i äuä am Schalter aacho het är no dänkt. Scho het d Maschine aafa loufe. Dr Ventilator het aafa surre, irgendöppis het drähjt u tschäderet. De het’s piepst, wahnsinnig lut, het’s dr Benni dünkt, Lämpli hei aafa blinke. Är het mit offnigem Muul i Gang use glost, öb dobe äch öpper erwachet syg. Aber es isch ruejig blybe.

Dr Computer het jitz nume no lyslig gsummet, wyter isch nüüt gange. «We öpper chunnt, de stelleni sofort alles wider ab, glych was passiert» het sich dr Benni überleit.  Ds Härz het polderet wi verruckt, wo är süferli het uf em Computer umetöggelet. De het är aafa mit em Muuspfyli umefahre, het hie emal klicket u dört. Meischtens isch nüüt Spannends passiert.Dr Benni het scho fasch wider wölle abstelle, wo är im Egge obe links vom Bildschirm es Bildli vore chlyne Wältchugle gseh het. Das het ne gwunderig gmacht. So eini het dr Lehrer ir Schuel ou u de het meh druffe chönne luege wie chlyn das d Schwyz isch u me het chönne drähje u luege wo me i d Ferie chönnt. «Also, das probiere i no us u nächhär isch fertig, de hören i uf», het sich dr Benni versproche.

prinzaessinEr het mit dr Muus uf d Wältchugle klicket u gwartet was jitz äch chämi. Lang isch nüüt passiert, plötzlich isch es nöijs Bild uftoucht mit eme Fänschterli zum Dryschrybe. Dr Benni het sy Name ynegschribe und uf »Suchen” klickt.  Nach es paar Sekunde isch e längi Lyschte cho, mit huuffe andere Lüt wo äuä alli ou Benni heisse. Mit viel Pröble und umeklicke het dr Benni gly mal usegfunde, wi me mit däm Ding cha spile. Das isch ja würklech bubiliecht! «Was di Grosse da geng für es Gschyss drum mache!» het är dänkt.  Dr Benni isch muetiger worde, het »Chaschperli” ynegschribe oder ”Guggumere”. Es het nid viel Schlaus usegluegt.  Aber einisch het är »Prinzessin” gschribe u nächhär wider uf »Suchen” drückt. Dr Bildschirm isch hällblau worde u nächhär sy komischi Zeiche druuf erschyne. Dr Benni het mit dr Muus wölle klicke aber nüüt isch passiert, är het dermit chönne umereifle wie är het wölle.  Dr Bildschirm isch langsam dunkler u nächhär schwarz worde. De het dr Muuszeiger uf em Bildschirm von elei aafa umeloufe.

Plötzlich het är aafa schrybe. E gälbi Schrift het uf em Hindergund glüüchtet. Dr Benni het zersch gmeint, er heig es nöjis Computerspieli gfunde, aber wo är het aafa läse, was da über e Bildschirm louft, isch är erchlüpft. «Tschou Benni » het är mit offnigem Muul gläse «I bi d Prinzässin. Dr bös Netzmagier het mi mit sym Netz gfange u lat mi nümme la gah! Wen ig ihm nid folge, de wott är mi uslösche!

Benni hilf mir, Benni chumm mi cho rette!»

Em Benni isch gschmuech worde. Dr Bildschirm isch wider schwarz gsy. «Was söll ig jitz mache?» Vorsichtig het sich dr Benni dr Muus gnächeret. Mou, die tuet wider wi normal, ds Pfyli isch uf em Bildschirm umezybet. Plötzlich isch dr Compi läbig worde. Im Lutsprächer het’s tschäderet, wi albe we dr Grossvatter ds Gugguggerli ufzoge het.  Nachhär isch e Text cho: »Prinzessinnenrettungsprogramm für Benni, bitte klicke mit der Maus dreimal in jede Bildschirmegge und blinzle drei Mal mit dem linken Auge.” Dr Benni het brav i jede Egge drümal klicket. Ds Blinzle isch ihm aber de doch z blöd vorcho. «Bitte Blinzeln nicht vergessen, bitte innert 20 Sekunden dreimal blinzeln, sonst wird das Programm abgebrochen!» isch uf em Bildschirm gstande. «Geit’s no!», het dr Benni gruefe, isch aber sofort wider lyslig gsy - we jitz öpper ufwacht! Sicherheitshalber het er blinzlet, grad zäh Mal nachenand, me weis nie, vilecht nützt’s öppis.

«Danke», isch uf em Bildschirm gstande, «drei Mal wäre genug gewesen. Bitte löse folgende Aufgabe: befreie die Prinzessin aus dem Labyrinth!» Uf em Bildschirm isch es Figürli uftoucht, wo uf ds Haar em Benni glyche het. «Wi isch das möglich!» het dr Benni gstuunet. Uf dr andere Syte vom Bildschirm isch es anders Figürli uftoucht, wo wi ne richtigi Prinzässin usgseh het.  D Prinzässin, im ene länge, hällblaue Chleidli isch wunderschön gsy, wi fasch alli richtige Prinzässinne. Si het blaui Ouge gha, wo guet zu ihrem Chleid passe, u Summersprosse um ihri chlyni Nase ume. I de länge, blonde Haar het si es wysses Mäscheli gha. «Wie es Geburtstagsgschänkli» het dr Benni für sich dänkt.

D Prinzässin het ihm gwunke. Ganz süferli het är mit dr Muus ds Benni-Figürli dür z Labyrinth zoge. Das isch kompliziert gsy, aber dr Benni isch schlau u het bald emal dr Boge dusse gha. Äntlech isch är byr Prinzässin äne gsy. Die het ihm d Hand gä und vor Fröid gstrahlet. «Ich bin Prinzessin Christeline. Hallo Benni, bitte rette mich!» isch uf em Bildschirm gschribe worde. U jitz isch obe rächts uf em Bildschirm e Uhr erschine. Dr Sekundezeiger isch rückwärts gloffe. «Ihr habt eine Minute, um aus dem Labyrinth zu fliehen. Gelingt es Euch nicht, wird die Prinzessin gelöscht!»

Dernäbe isch e Figur vomene hässliche, böse Zouberer gstande, dä het dräckig glachet und isch uf und ab gumpet.

«Achtung, fertig, los» isch uf em Bildschirm erschune.

Dr Benni isch wi pläm vor em PC ghocket. D Sekunde sy abgloffe wi e Wasserhane wo tropfet. Dr Benni het nid gwüsst, was är jitz söll mache. D Prinzässin het aafa gränne.  «Mach öppis!» het si ihm zuegruefe. «Was söll i de nume mache?» het dr Benni gjammeret.

«Mach fürschi - mir müessi hie use!»

Iz isch dr Benni erwachet. Schnäll isch dr är mit dr Prinzässin zäme mit dr Muus dür z Labyrinth zoge. Z zwöit isch es no schwiriger gsy als elei. No zäh Sekunde, u dr Usgang isch no so wyt ewägg! Aber gäge Schluss zue het dr Benni plötzlich ganz klar gseh wo är düre muess. Mit es paar schnälle Züg mit dr Muus isch är mit dr Prinzässin mit eim letschte riese Gump us em Labyrinth gsatzet.  «Gopf, ir alleriletschte Sekunde!» het är gsüfzget. Uf em Bildschirm isch ds Bild vor Prinzässin langsam immer grösser worde, si het gstrahlet. Jitz het meh ihri blaue Ouge guet chönne gseh u ihri Summersprosse, si het sogar chly Lippestift gha u ganz es schöns Lächle. «Merci Benni» isch immer wider uf em PC erschune, und het blinket. Derzue si Härzli, Balöng u Blueme über e Bildschirm gschneit. Vorusse hei d Sunntigsglogge glütet.

Nächhär isch ds Bild wider chlyner worde u i Egge obe rächts vom Bildschirm grütscht. D Prinzässin het em Benni uf em Bildschirm gschribe. «Liebe Benni, merci vielmal, das du mir ghulfe hesch. I weis, das du schampar gärn e eigete Computer hättsch, aber leider chan i dir keine schicke.  Aber i wüsst es Trickli: im Momänt git’s grad e grosse Wettbewärb wo me cha e Compi gwinne. I kenne di richtige Antworte - u die verrate ig dir, los, tröjim nid, schryb uf».

Dr Benni isch grad häreghocket u het uf si Zeichnigsblock sorgfältig d Antworte gschribe. Nächhär het ihm d Prinzässin no genau erklärt, wie me am Wettbewärb cha mitmache. Mit viil Muusklicke und umeprobiere het är dä gross Wettbewärb gfunde. Es het ne nümme überrascht, das d Antworte vor Prinzässin guet zu de Frage passt hei. Är het alles so gmacht, wie si ihm grate het. Mit eme letschte Taschtedruck het är ds Wettbewärbsformular im Compi abgschickt - so eifach geit das. De het dr Benni dr Compi abgstellt, het syni Sibesache versorget. Es het usgseh, wi we nie nüüt wär gsy. De isch är id’s Wohnzimmer übere, isch lässig uf ds rote Sofa gläge u het derglyche ta, wie är syt Stunde nüüt anders gmacht hätt, als glängwylet imene Buech z läse.

Einisch am e Tag, dr Benni isch grad us dr Schuel heicho, het ihm d Muetter gseit: «Benni, hesch es Päckli übercho, i ha dir’s i dys Zimmer gleit. Aber gäu, zieh zersch d Schue ab! Mir ässe de grad!» Gwundrig isch dr Benni i sys Zimmer gsuuset, tatsächlich, es Päckli isch uf em Bett gläge. Mit ere Chinderschrift isch syni Adrässe druffegstande u Härzli, Blüemli u Balöngli sy uf ds Packpapier gchläbt gsy. Dr Benni het ds Päckli ufgschrysse, das die das Züüg geng so guet müesse ypacke. Dinne isch es Briefli gläge.  «Lieber Benni», isch gstande »leider haben Sie keinen Computer gewonnen, aber trotzdem vielen Dank, das Sie an unserem Wettbewerb teilgenommen haben. Als Trost senden wir Ihnen den beiliegenden kleinen Preis.” Drunder isch irgend e Chribel vore Underschrift gstande.